Frábær leikur okkar manna í Doha

Glæsilegur handboltaleikur er í gangi hjá liðinu okkar gegn Frökkum í Doha. Frábært að sjá hvernig okkar menn hafa í fullu tré og meira en svo við hina fræknu Frakka, sem oft hafa verið bezta handboltalið heims.

Snilldartaktar eru í íslenzka liðinu, t.d. Aroni Pálmasyni (með fjögur mörk í hálfleik), og Björgvin hefur staðið sig afar vel, var kominn með 47% markvörzlu, þegar leik var langt komið.

Að ná forystunni, eftir að Frakkar höfðu verið yfir framan af fyrri hálfleik, var frábært, en ekki síðra hvernig okkar menn héldu sinni forystu, komust jafnvel þrjú mörk yfir og eru með 14:12 í leikhléi. En fyrsta mark í seinni hálfleik er Íslands, 15:12. Og nú gerði Róbert 16. mark okkar – fjögurra marka munur. Ekki löngu seinna er staðan orðin 16:15, og þá "lifnar yfir Frökkum hér í Doha," og svo jafna Frakkarnir, 16:16, og Aron Kristjánsson þjálfari okkar tekur leikhlé. ... Guðjón Valur gerði tvö mörk í röð og kom okkur upp í 19:17, síðan kom mark frá Frökkum, en Aron bætti þá við enn einu.

Í miðjum seinni hálfleik er staðan jöfn, 21:21, en áhorfendur hafa fengið mikið fyrir snúð sinn, mörg flott mörk skoruð og baráttan hörð. Frakkar voru svo komnir í 22:21, en Alexander Peterson jafnaði þá með sínu fjórða marki. Karabatich fekk þá sína þriðju brottvísun og rauða spjaldið. Einum færri komust Frakkar samt yfir með góðri baráttu, en Snorri Steinn var fljótur að jafna það í flottum leik. 8 mín. eftir!

"Stál í stál allt til loka". Ahgahfrey kom Frökkum aftur yfir, öflugur maður, en Aron jafnaði, 23:23. Frakkinn kom svo félögum sínum aftur yfir. Og nú stuttu seinna eru þeir yfir 26:24, fjórar mín. eftir. Ásgeir Örn minnkaði í 1 marks mun með sínu 5. marki. Róbert jafnar seinna með flottu marki – og Björgin ver næst flott einu sinni enn; en Aron fær brottvísun.

Strákunum okkar fylgja héðan beztu siguróskir, það yrði frægur sigur!

Það hafði ég ritað hér fyrir fram, en leiknum lauk samt glæsilega fyrir okkar stjörnumenn, með jafntefli við meistarana Frakka, 26:26.

Frábær úrslit gegn Frökkum

DV-menn stikkfrí frá grundvallarreglum réttarríkisins?

Voru það "sak­laus mis­tök í starfi" blaðamanna DV að halda uppi ítrekuðum árásum á starfsmenn utanríkisráðuneytisins og Hönnu Birnu með? Á nú að skýla sér á bak við, að blaðamönnum, öðrum fremur, eigi að vera heimilt að fara með meiðyrði gegn ráðherrum og embættismönnum, af því að einhver Alþjóða-fjölmiðlstofnun, IPI, segi þetta "saklaus mistök" (sic) og að málshöfðun gegn fjölmælismönnum í blaðamannastétt "sýni ekki virðingu gagn­vart hlut­verki fjöl­miðla"?

Erum við þá búin að finna hér sérajóna nútímans? Blaðamönnum heimilt að slá upp stríðsfyrirsögnum um meinta glæpi starfsmanna ríkisins, með stærðar myndum af þeim, en bera samt enga ábyrgð á ósönnuðu níði sínu?!

Minnumst þess líka, að ýmsir þeir, sem Rúv á ýmsum rásum sínum raðaði á mælendalistann í gær og fyrradag um mótmælaaðgerð orðljóts Svavars Knúts og félaga, sögðust m.a. krefjast afsagnar Hönnu Birnu vegna 'lekamálsins'.

En þetta er að fara öfugt að hlutunum, eins og valdbeitingarhópum er tamt. Látum dómstóla skera úr um málið, ekki gulu pressuna og ekki þennan dómstól götunnar og smalaðra vinstri manna (í bland við tónlistarmenn, sem eiga í kjaradeilu við Dag B. Eggertsson & Co., ekki ríkisstjórnina!). Hver maður skal skv. stjórnarskránni teljast saklaus, þar til hugsanleg sekt hans kann að sannast. Menn eiga að halda fast í þá grundvallarreglu!

PS. Glöggur og góður Facebókarvinur ritaði á Facebókarsíðu mína:

"RÚV hefur eftir: "Það lýsir ekki mikilli virðingu fyrir eftirlitshlutverki fjölmiða að opinber starfsmaður krefjist fangelsisdóms eða annarra opinberra refsinga vegna þess sem virðast hafa verið mistök, segir Scott Griffen, verkefnisstjóri fjölmiðlafrelsins hjá International Press Institute." –––Ef þessi Scott Griffen og International Press Institute álíta "eftirlitshlutverk fjölmiðla" felast í því að ljúga refsiverðu athæfi upp á saklaust fólk, er öllu snúið á haus. Auk þess getur DV ekki gegnt neinu eftirlitshlutverki, því að blaðið hefur fyrir löngu dæmt sig út úr siðaðri og viti borinni umræðu. http://ruv.is/frett/undrast-krofu-um-refsidom-i-meidyrdamali "

 

Sláandi góðar ábendingar Facebókarvinarins! En svona gervifrétt, eins og þessum ummælum hins illa upplýsta Griffens, heldur Fréttastofa Rúv vitaskuld á lofti –– og ekki í fyrsta sinn sem þar er lagzt á sveif með hinu óvandaða blaði DV, ef það þjónar pólitískri lund fréttamanna Rúv eða sleppur þar í gegn hjá gagnrýnislausum starfsmönnum, eins og hér sýndi sig.

Undrandi á kröfum Þóreyjar

Rúvarar verja gamla kratann Óðin Jónsson, vilja halda honum!

Fréttamenn á marg-misnotaðri Fréttastofu Rúv ryðjast nú fram til að fá að halda hlífiskildi yfir sínum Óðni Jónssyni. Kristján Friðriksson ritar um þetta mál á síðu 615 manna Facebókarhóps, Eftirlit með hlutleysi RÚV:

• "Jæja þá er eins gott hjá nýjum útvarpsstjóra að taka líka til hjá fréttamönnunum sem telja sig eiga að taka ákvarðanir fyrir hann um hvað er tímabært og hvað ekki í viðleitni hans við að reyna að bjarga rekstri stofnunarinnar og þar er fréttastofan líka meðtalin, sem þeir auðvitað telja ekki vera."

Um það skrifar einnig glöggur maður þar, Sigurður Ragnarsson :

• "Það er nú kannski gott, að þeir standi þétt við bakið á fráfarandi fréttastjóra, því að þá þarf ekki nema eitt gott spark í afturendann á þeim til að losna við þá alla saman, sem talsverður hluti af fréttamönnunum því miður verðskuldar."

Og Kristjan Fridriksson bætir við:

• "... Og hverjir bera ábyrgðina á því aðrir en þeir sjálfir og vinstri slagsíðan sem þeir hafa skapað? Það er engin vafi á að þessi síða [áðurnefnds Facebókarhóps] hefur sannað ágæti sitt, en svo er að vona að nýr fréttastjóri og útvarpsstjóri fari að lögum um að fréttaflutningur stofnunarinnar eigi að vera hlutlaus. Um annað er að ég held engin að fara fram á..."

Því fyrr sem hreinsað verður til á Fréttastofu Rúv, þeim mun betra.

Ótímabært að skipta um fréttastjóra

Óðinn las fréttina af eigin uppsögn

Á því furðar sig fyrrv. fréttastjórinn Elín Hirst, þetta væru undarleg, óviðeigandi vinnubrögð út frá faglegum viðmiðum fréttamanna. En við erum ýmsu vön frá Fréttastofu Rúv og þetta saklaust í samanburði. Vikum saman hefur þessi stofnun verið misnotuð að undanförnu í þágu ESB-innlimunarstefnu Samfylkingarinnar, og það er ekkert lát á misnotkuninni. Ég er farinn að tala um þetta sem bein vinnusvik viðkomandi fréttamanna, og skyldi engan undra. Rökstutt hef ég þetta sjónarmið mitt margsinnis að undanförnu, en hlutleysisbrot á Fréttastofunni eru hins vegar gamalkunnugt fyrirbæri og hafa gjarnan verið gagnrýnd jafnóðum og þó minna en vert hefði verið.

Elín hissa á vinnubrögðum fréttastjórans

Verða Óðinsvé ekki svipur hjá sjón?

Viðbrögðin eru snörp hjá nýjum útvarpsstjóra við niðurstöðu úttektar á miklum hallarekstri stofnunarinnar. Öllu framkvæmdastjórum þar verður sagt upp störfum, en þeir eru:

Óðinn Jónsson fréttastjóri, Ingólfur Bjarni Sigfússon nýmiðla- og vefstjóri, Berglind G. Bergþórsdóttir mannauðsstjóri, Bjarni Guðmundsson framkvæmdastjóri sjónvarps, Skarphéðinn Guðmundsson dagskrárstjóri, Magnús R. Einarsson, settur dagskrárstjóri á Rás 1 og Rás 2, Eyjólfur Valdimarsson sem fer fyrir tæknimálum, Þorsteinn Þorsteinsson markaðsstjóri og Bjarni Kristjánsson fjármálastjóri.

Ekkert veit ég um þessa menn nema Óðin, Ingólf Bjarna, Bjarna og e.t.v. einn enn.

Í framhaldinu fær hin svæsna ESB-meðvirkni á stofnuninni vonandi að heyra sögunni til og að Ríkisútvarpið standi undir nafni og gæti fyrst og fremst hagsmuna og menningarlífs þjóðarinnar, ekki þess áhugamáls margra í vinstri flokkunum að vilja troða Íslandi undir klafa stórbokka stórveldanna í Evrópusambandinu.

Framkvæmdastjórum RÚV sagt upp

Magnús Geir Þórðarson ráðinn útvarpsstjóri

Til hamingju, Magnús Geir! Sannarlega er þetta mikið ábyrgðarstarf og mikils vert að fá að því hæfan mann sem sýnt hefur mikinn árangur í störfum.

Ríkisútvarpið býr yfir miklum menningarlegum sjóðum eftir sín rúm 80 ár og engin þörf að glata neinu af því, en umfang fyrirtækisins hefur bólgnað út og margir þar á háum launum, en það eru oft slíkir sem verða að upplifa það síðar á ferlinum, að hagræðingarhnífurinn lendi á þeim í óhjákvæmilegum samdrætti. Ég spái framhaldi á uppsögnum eða styttri vinnutíma sumra og skertum sporslum, en að Magnús Geir getið unnið farsællega, af ferskleik og þrótti fyrir þessa stofnun í samvinnu við mennta- og menningarmálaráðherrann.

Þá verður ennfremur að gera skipulega könnun á margendurteknum tilefnum kvartana vegna misgóðrar gæzlu Fréttastofu Rúv á því hlutverki sínu að gæta óhlutdrægni og viðeigandi hlutlægni. 

Magnús Geir ráðinn útvarpsstjóri

Beðið tilkynningar um val útvarpsstjóra

Magnús Geir Þórðarson er mjög hæfur maður, hefur gert mikla hluti og góða í faglegum störfum sínum og gróft af sumum að láta sem hann yrði í vasanum á Valhallarmönnum eða Davíð Oddssyni. Svo hef ég vissar efasemdir um að Bjarni sé heppilegur sem útvarpsstjóri.

Að ofurvaldi vinstri manna á Ríkisútvarpinu eigi og hljóti að linna á næstu misserum, ætti að vera flestum öðrum en þeim vonarefni.

Búið að velja útvarpsstjóra

Góð mynd

Ég mæli eindregið (að vísu heldur seint) með myndinni Cry Freedom sem Sjónvarpið sýnir í kvöld og fjallar um aðskilnaðarstefnuna í Suður-Afríku og baráttuhetjuna Steve Biko.

Skorið niður hjá ríkinu í ríkinu: Rúv!

Ánægjulegar fréttir, eiga sér væntanlega uppruna sinn hjá Illuga Gunnarssyni mennta- og menningarmálaráðhera og Bjarna fjármálaráðherra: skera rækilega niður hjá "ríkinu í ríkinu" : Rúvinu, með fjöldauppsögnum í því ofvaxna kerfi, til sparnaðar fyrir skattgreiðendur. Þá fækkar líka hlutdrægnisbrotunum.

Benda ber á, að þessi ríkisstjórn hefur þó ekki tekið ákvörðun um jafn-víðtækar uppsagnir og áttu sér stað fljótlega eftir hrunið. Þessi stjórn hefur nú ákveðið 60 uppsagnir (þar af 39 um áramótin), en í nóvember 2008 var 44 sagt upp og 50 í lok janúar 2009 (skv. Eyjufrétt).

Þaulsætnir fréttamenn hafa án efa safnað miklum sporslum gegnum tíðina og orðið þungur baggi á stofnuninni, en háu launin voru þá líka veiki punkturinn á þeim sem gerði þá þeim mun viðkvæmari fyrir glöggum augum niðurskurðarmanna, og nú er það líklega Páll Magnússon sem ekki hvað sízt hefur fengið það verkefni í hendur: að sjá út augljósu sparnaðarkostina.

Hér verður nú sparað um hálfan milljarð króna og löngu kominn tími til, en trúlega má ganga enn lengra í sparnaðarátt og gjarnan selja Rás 2.

PS. Misnotaður fjölmiðill getur átt von á aðgerð sem þessari fremur en annar, sem gegnir hlutverki sínu af fullri óhludrægni fyrir þjóðina. Rúv hefur mjög verið beitt í þágu t.d. ESB-innlimunarstefnunnar. Það sama á við um EYJUNA. Og nú er "ritstjóri Herðubreiðar" Karl Th. Birgisson, farinn að skrifa þar pistla, lokaða fyrir athugasemdum, og níðir þar í dag (að mínu mati) afar góðan, fullveldissinnaðan þingmann, Birgi Ármannsson, undir þessari fyrirsögn Karls: "Birgir fórnar fullveldinu" (!!!).

Hvar er aðstaða Birgis eða samherja hans til að svara þar fyrir sig?! Gengur sjálfur aðalmaðurinn á Eyjunni (fyrir utan eigandann), Karl Th. Birgisson, með þessum hætti fram "með fögru fordæmi" um lýðræðislega umræðu?!!!

Fréttatímum fækkað og þeir styttir

Furðuleg forgangsröðun og ævintýraeyðsla Gnarrista

Mjög er hæpið að kvartmilljarðs-göngubrýrnar yfir Elliðaárósa verði notaðar í stórum stíl, þótt þær stytti leið um 700 m fyrir hjólreiðamenn úr Grafarvogi. Forgangsröðun Gnarrista á eyðslufé er furðuleg. Útigangsmenn, sem Gnarrinn hafði látið í skína, að njóta myndu hans liðsinnis, enda hann sjálfur komizt í nána snertingu við kjör þeirra á sínum sokkabandsárum, hafa hins vegar ENGAR umbætur fengið á sínum húsnæðisvanda og öðrum nauðsynjamálum, eins og skýrt kom fram í viðtali við Þorleif Gunnlaugsson varaborgarfulltrúa fyrir rúmri viku á Útvarpi Sögu. Þetta er jafnvel svo slæmt, að hans sögn, að allar helztu umbætur á málum útigangsmanna áttu sér stað þegar sjálfstæðismenn voru við völd í borginni, en alger stöðnun hafi tekið við síðan þá! Öllum úrbótatillögum Þorleifs í þessum efnum er stungið undir stól.

Ég hef litið á Jón Gnarr sem algeran charlatan í flestum pólitískum málum og hef ekki fundið ástæðu til að breyta því áliti mínu, það styrkist frekar, ef eitthvað er, með hverri nýrri ákvörðun hans. Viðtal hans í visir.is í gær um flugvallarmálið er til dæmis algert hneyksli og lýsir ótrúlegum hroka manns í opinberu starfi gagnvart vilja almennings.*

Vanræksla hans við þá, sem verst hafa það í Reykjavík, er svo alveg sér á báti, en á meðan því fer fram, eyða hann og fylginautar hans stórfé í vitleysu-framkvæmdir eins og Hofsvallagötuævintýrið og nú í þessa brúasmíð, sem var fjarri því að vera brýnt forgangsmál. Hún er þá miklu fremur trúaratriði hjá þessum anti-bílistum, og þetta segi ég, þótt mikill hjólreiðamaður sé.

• Langfjölmennasta undirskriftasöfnun (nær 70.000 manna) sem hingað til hefur farið hér fram nægir ekki til að lækka rostann í meirihluta hinna 15 borgarfulltrúa -- og heldur ekki niðurstaða skoðanakönnunar MMR 9. til 11. september þar sem í ljós kom, að 71,8 prósent íbúa Reykjavíkur vilja flugvöllinn áfram í Vatnsmýri. 

Brýrnar formlega teknar í notkun